 |
| الشاعر سعيد شحاتة |
1
هنا العسكريون محضُ قنابل
هنا الهاشميون محضُ افتراء
هنا أنت والكاتبُ القرفصاء
وبائعةُ الوردِ فوق الضحايا
تفتّش عن زنبقات السماء
وسيدةُ القصر بين المرايا
تهاتف سرا بيوت البغاء
وأنت تسير على الأرض هونًا
وتنفخ سُمّك "كعك الإباء
فأنت الذى أطلق السهم فينا
وأنت المظفّرُ فى كربلاء
فكيف نحارب ربًّا ضعيفًا
يسير على الأرض كالخنفساء؟
2
- المجدُ للثوّارِ صنّاعِ الحياه
من قالوا لا فى وجهِ من أحنوا الجباه –
المجد لجنود الإله فى الأرض
لعشوش يمامك فى انحطاط البرد
للى استعانوا...
وقاموا صلّوا الفرض
المجد للورد اللى ع الصفين
لملايكه نازلين فى الميدان حافيين
لمراكبى ماشى يغنى ع الشطين
لقلوب بريئه وضحكتين صافيين
لشعاع أمل فى ملامح الرافضين
لإيدين بترسم ضحكة العشاق
وإيدين بتزرع شاليتين ياسمين
وإيدين بتكتب ع الجدار طالعين
نعدل خطاكى ونخلقك م الطين
المجد للواقفين على القُبّه
بيقيسوا مصر بمسطره ونِبّه
وبيزرعوا الأحلام على التبّه
المجد للحبّه اللى فى كفوفى
المجد لدروعك ولسيوفى
للى انكتب بالمصرى والكوفى
واللى ابتسم لك واشترى ضيوفى
وكتب حروفك قبل ما تشوفى
المجد مجد الصوفى والرايه
لوشوش بتزرع فيكى ضلايه
للى استقاموا وسقّفوا معايا
المجد للوطن اللى جوايا
لمرايه واقفه تبصّ فى مرايه
لدموع عنيكى وقوّة الآيه
لرحايا دايره وقلب سلايه
المجد للفايه وشواشى الريح
لقلم فصيح ولمعجبانى صريح
الديك وقف على قبلتك بيصيح
خدتينى من غير إذن أو تصريح
ضميتى قلبى برقة الصايمين
ورسمتى قلبك مرتبه ومراجيح
وعملتى روحى ضريح لأوجاعك
حطيت إيديا ف إيد كلاب الروم
وراهنت بيكى وخنت أتباعك
ومشيت فى طهطا وطلخا والفيوم
أهتف وأبيع وأضحك لبياعك
وألعن طباعى وأسبّ فى طباعك
ملعون أبو الوطن اللى مات م الجوع
لو كنتى هتضمينى لجياعك
المجد لدراعك سلاح الموت
لعيون حبيبتى وضربة النبوت
لغيطان دره وكردان لبنت بنوت
لدموع جدع عبّى النهار فى بيوت
لميدان طلع يهتف بعلو الصوت
لتابوت وطن ووطن أساسه تابوت
للى ابتسم للنور فى بطن الحوت
للقوت فى لحظة ما السكوت ينذلّ
المجد للثوره ف وطن محتلّ
للى انتفض فى جيوش غبى ومختلّ
لعيال بتجرى تبيع عيدان الفل
لضلوع صبيّه بتترعش فى الطل
المجد للكل ف بدن واحد
للواحد الواقف وراه الكل
المجد للذل ف طريق النور
للأرض لو فارت كما التنور
للضحكه لو هزّت زوايا الدور
لدراع حبيبتى المرمر البنور
لطيور بتهتف خلف سرب طيور
للخاتم المسحور بضلعينى
لطبيعه مصرى وروح فلسطينى
يا صاحبة الصون والرجال الدون
ذليتى أمى يا ريت تذلينى
والدى اللى حارب جرارات الكون
شرب المرض بالمعلقه الصينى
وفتح لى عبه يبوح لى بالمكنون
وفرد لى إيده عشان يعدّينى
يا مصبّره المعتوه على المأمون
صبى الوجع فى عروقى واسقينى
طالع بقلبى المهرى والمعجون
ألحس تراب الرفض فى جبينى
طالع معايا ملخص المضمون
وف إيدى سيف وبياده حطينى
المجد للزينى وحسن ودياب
للى انتشى وخبّط على الأبواب
لكتاب رفض يضحك فى وش كتاب
طالعين مع الدراويش على الأعتاب
طالعين نسفّ محبتك بتراب
المجد للأحباب على السكّه
لجنيه ورق على كام جنيه فكّه
المجد للتلميذ على الدكّه
لغناوى عكّا وأنبياء الرب
لحبيب زلِيخا اللى اتولد فى الجُبّ
للأب لمّا يواجه البهوات
يا رافضه تدينى انتصار الذات
يا محكمه ف روحى الكلاب والجات
ومعذبانى ف حضرة الباشوات
لو مات شعار الحلم فى ضلوعى
وصى الصبايا يفوّقوا الأموات
المجد للشعارات ولميدانى
للى اعترض على عمّه سلطانى
للى انحنى ووقفنى بحصانى
وحدفنى يمّ هناك وعلانى
المجد للبانى الوطن بدراع
للى اشترى وتاجر وباع واتباع
ورفض سكاتى وبدّل الأوضاع
المجد للأتباع وللساحه
للى انتصر على كلبه نبّاحه
لملاك معاه كرباج وتفاحه
لأراضى بور وأراضى طرّاحه
المجد للفلاحه بنت الدار
لمقام حبيبى وفرحة الزوّار
لعودين جريد فى مواكب الأنصار
المجد للسريحه والأنفار
المجد للأحرار ولاد الضىّ
يا أم الشفايف وردتين نوّار
قلبى المشاكس ينطويلك طىّ
مطرح ما تمشى بيطرح الصبّار
والنيل بيشرب من إيديكى النىّ
من يوم ما أرضك طلّعت ثوار
حسيت بإن الأرض كائن حىّ
